NVNTII LATINI BREVES

Reijo Pitkäranta auctore

28.1.26

Princeps minister Finniae Petteri Orpo itinere in Sinas suscepto praesidentem Xi convenit et cum eo et aliis ducibus summae auctoritatis de cooperatione inter utramque civitatem corroboranda collocutus est.

24.1.26

Copiis Daniae in Groenlandiam missis imperatum erat, ut ad bellum cum Americanis gerendum paratae essent. Postea autem praesidens Trump negavit se Groenlandiam per vim expugnare velle.

19.1.26

Praesidens Trump, quippe qui praemium Nobelianum pacis non accepisset, epistula primo ministro Norvegiae missa scripsit iam esse, cur etiam aliud quam de pace cogitaret. Se octo bellis finem fecisse constare.

16.1.26

Maria Corina Machado, dux oppositionis Venetiolae, diurnariis narravit se praemium Nobelianum pacis anno proximo sibi datum praesidenti Donald Trump obtulisse et id in Aedibus Albis rellictum sibi ab eo non redditum esse.

15.1.26

Praesidens Trump pollicitus est se Iranianis regimini reclamantibus auxilium missurum esse, sed exactius non dixit, qualis generis id futurum esset. Rerum periti autem putant fieri posse, ut de ictibus aeriis in Iraniam faciendis agatur.

8.1.26

Elina Valtonen, ministra a rebus exteris Finniae, coram parlamento locuta haec fere dixit: verba minitantia praesidentis Donald Trump et regiminis eius de Groenlandia animos Europaeorum sollicitos reddere.

7.1.26

Qualis generis canem quisque sibi alendum suscipiat, inde pendere videtur, ubi habitat. Incolae urbium canes familiares parvae staturae , qui facile sinu recipiuntur, amare solent, cum ruricolae maioribus seminiis ut cani venatico faveant.

7.1.26

Radiatio e calamitate nucleari Tshernobyliana orta ad discendum aliquantam vim habuit. Investigatores enim animadverterunt eos, qui maiori praecipitationi nucleari expositi erant, postea in studiis debilius successisse.

5.1.26

Praesidens Donald Trump dicto Russorum, ex quo domicilium praesidentis Russiae Vladimir Putin ab Ucrainis dronis petitum sit, non iam credit, quamquam antea tali rumori fidem habere videbatur.

5.1.26

Impetibus in Venetiolam factis omnino 80 milites et cives interfecti sunt. Dicunt paene omnes custodes corporis praesidentis Maduro mortuos esse.Praesidens Donald Trump ait Americanos in Venetiola iam dominari.

5.1.26

Copiae Americanae Venetiolam aggressae praesidentem civitatis Nicolas Maduro cum coniuge deprehenderunt et eum per vim abductum Novum Eboracum (vulgo New York) deportaverunt. Accusatur de gravibus sceleribus ad drogas pertinentibus.

4.1.26

In Irania sumptus victuales valde creverunt, quo facto inter magistratus et cives incremento pretiorum reclamantes conflictus violenti coorti sunt. Illis tumultibus saltem 16 homines vitam amisere et amplius 500 deprehensi sunt.

4.1. 26

Ex Corea Septentrionali missile ballisticum ad Mare Iaponicum versus emissum est. Rerum periti censent id experimentum ad Americanos provocandos factum esse. Eodem tempore cognoscere potuerunt, essetne illud missile satis bonae condicionis.

4.1. 26

Copiae aeriae Britanniae et Francogalliae impetum communem in Syriam fecerunt, ut loca subterranea ab ordine Isis antea occupata delerent. Credebatur enim in illis spatiis arma et materia explosiva asservari.

2.1.26

Lusus nummarius apud pueros in Finnia valde increbruit, quod imprimis eos sollicitat, qui cum hominibus lusionibus addictis opus faciunt. In causa sunt commendatio mercium et rete, cuius ope ludus facilis factu est.

2.1. 26

Zahran Mamdani, praefectus urbis Novi Eboraci (vulgo New York) nuperrime electus, ius iurandum muneris dedit. Caerimonia corano adhibito celebrata est, cum ille islamista esset. Qua re omnes oculis intentis spectabunt, quo modo magistratum gesturus sit.

1.1.26

In Helvetia, idque In sede scridatoria Crans Montana, ingens calamitas accidit, cum in thermopolio eius incendium cum explosione ortum est. Magna multitudo hominum novum annum celebrantium vitam amisit et circiter 100 vulnerati sunt.

1.1.26

Capulum submarinum inter Finniam et Estoniam intercedens gravia detrimenta cepit. Cum hoc animadversum esset, magistratus nostri navem onerariam in Sinu Finnico occupaverunt et 14 nautas e diversis terris oriundos deprehendere.

1.1.26 

Novo anno 2026 ineunte praesidens Alexander Stubb orationem nationi habuit. Ait nos Finnos aedificatores pacis esse, quorum opera aliis opus esset. Idem dixit relationes inter Finnos et Russos permanenter mutatas esse.

1.1.26

Tempestas vehementissima Hannes appellata cum ventis fortissimis in Finnia magna damna effecit arbores et totas silvas caedendo et tecta domuum destruendo. Multa milia familiarum intermissionibus electricitatis laborabant.