Certamen Quirinale
Certamen Quirinale III
Academia Latinitati Fovendae ad tertium Certamen Quirinale omnes antiquitatis litterarumque studiosos invitat, ut optima symbola inter a. 2020 et a. 2025 Latine publici iuris in commentariis periodicis, libris voluminibusve doctis facta praemio honestetur.
Ab universis scriptorum auctoribus rogatur, ut symbolam (iam typis traditam) non ex alio sermone versam nec quinque paginis breviorem iudicibus ante Kalendas Februarias a. 2026 mittant ad inscriptionem cursualem electronicam, quae est certamen.quirinale@gmail.com. Symbolae tantum accipientur, quae e plagula .pdf constant. Unam symbolam exsistimandam omnis candidatus tradat.
Collegium sodalium Academiae attente considerabit ac iudicabit commentationes doctas (e.g. philologas, litterarias, philosophicas, theologicas, archaeologicas, historicas, glottologicas vel musicologicas), aestimata et stili Latinitate et argumenti gravitate. Symbola enim enixe exquiritur non solum Latino sermone emendato scripta, sed etiam de rebus quae maioris sint momenti ad progressum disciplinae cuiusvis provehendum. Qua de causa textus omnes reicientur sive qui his normis non responderint, sive qui ad argumenta privata vel pensa scholastica pertinere videbuntur sive qui ante Kalendas Ianuarias a. 2026 nondum publici iuris facti sint. Cum praemium proponatur curante et auspice Academia Latinitati Fovendae, cuius socii munere iudicis fungentur, nullus sodalis Academiae praemium accipere poterit.
Praemium victoris erunt Euronummi 1000 una cum diplomate. Omnes candidati de exitu certaminis fient certiores mense Maio anni 2026 et victor in conventu ALF eiusdem anni praemio honestabitur.